'तेजस्वीचा ताबा मला द्या अन्यथा स्नेहलला ठार मारतो'; सासूला दिली धमकी

सातारा : सहा वर्षांच्या बालिकेचा ताबा मिळवण्यासाठी पत्नीचे अपहरण केल्याप्रकरणी पती व त्याच्या मित्रावर शहर पोलिस ठाण्यात गुन्हा दाखल झाला आहे. मोहोळ पोलिस ठाण्यात दाखल झालेला हा गुन्हा तपासासाठी सातारा पोलिसांकडे वर्ग करण्यात आला आहे. तानाजी गोरे (रा. टेंभुर्णी रोड, कुर्डू, ता. माढा, जि. सोलापूर) व विठ्ठल माळी (रा. पंढरपूर, जि. सोलापूर) अशी गुन्हा दाखल झालेल्यांची नावे आहेत. याबाबत स्नेहल तानाजी गोरे, (वय 25, रा. गोरे वस्ती, टेंभुर्णी रोड, कुर्डू, ता. माढा, सध्या रा. विमलविश्व अपार्टमेंट, खेड, ता. सातारा) यांनी फिर्याद दिली आहे.

तानाजीचा पहिला विवाह झाला होता. ही गोष्ट लपवून त्याने स्नेहल यांच्याशी लग्न केले. या दोघांना सहा वर्षांची तेजस्वी नावाची मुलगी आहे. ती स्नेहलच्या आईकडे पुण्यात राहते. तानाजीने फसवणूक केल्याचे लक्षात येताच या दोघांचा घटस्फोटाचा खटला आता न्यायालयात दाखल झालेला आहे. खटला सुरू असतानाच तानाजीला तेजस्वीचा ताबा हवा आहे. त्यासाठी त्याने विठ्ठलच्या मदतीने मंगळवारी (ता. 23) ते गुरुवार (ता. 25) या कालावधीत बॉंबे रेस्टारंट चौकातून स्नेहलला कारमध्ये जबरदस्तीने बसविले. त्यानंतर तिचे हातपाय रस्सीने बांधून पंढरपूर, मोहोळ, अक्कलकोट असा प्रवास करत कर्नाटक राज्याच्या सीमपर्यंत नेले. त्यानंतर तिच्या आईला फोन करून "तेजस्वीचा ताबा मला द्या अन्यथा स्नेहलला जीवे ठार मारतो,' अशी धमकी दिली होती.

त्यांच्या ताब्यातून सुटल्यानंतर स्नेहलने मोहोळ पोलिस ठाण्यात लेखी तक्रार अर्ज दिला होता. त्यानंतर पोलिसांनी तानाजी व विठ्ठल यांना बोलावून घेतले होते. चौकशीनंतर याप्रकरणी गुन्हा दाखल करून तो तपासासाठी शहर पोलिस ठाण्याकडे वर्ग केला. उपनिरीक्षक सुहास रोकडे तपास करत आहेत. 

आदेशाचा भंग केल्याने साताऱ्यातील चार हॉटेल व्यावसायिकांवर गुन्हे

ये वो बंधन है जो कभी टूट नहीं सकता! अमेरिका- भारताचे मैत्रीचे नाते अतूट राहिल; नौदलाने गाण्यातून केला विश्वास व्यक्त 

Edited By : Siddharth Latkar